Búgin Taraz memlekettik pedagogıkalyq ýnıversıtetinde «Zamanaýı bilim: ádisnama, teorııa men tájirıbe» atty halyqaralyq konferensııa ótti.
Atalǵan konferensııaǵa AQSh, Reseı, Belarýs, Latvııa, Anglııa, Chehııa, Germanııa jáne ózge de memlekettiń ǵalymdary qatysyp, pikir almasty. Kóne Taraz tórinde qolǵa alynǵan ǵylymı-praktıkalyq konferensııanyń jınaǵyna aldyn-ala maqala jibergen qatysýshylar iriktelgen. Olar óz jumystarynda qazirgi bilim salasyna úles qosýdyń tyń joldaryn qarastyra otyryp, barshanyń múddesin qamtamasyz etetin pikirlerin alǵa tartty. Ǵylymı sharany atalǵan ýnıversıtettiń oqý ádistemelik jumystar jónindegi prorektory Sáýle Álimbaeva ashty.
Jańa dáýirdiń oqý baǵytyn saralaǵan jıynda bilim baǵdarlamasyn qaıta quryp, tyń ádisterdiń enýin qamtamasyz etý, sondaı-aq, zaman talabyna saı pedagog mamandardy oqytyp, tárbıelep shyǵarýdyń mańyzy alǵa tartyldy.
Al Germanııadan kelgen PhD doktor Gotfrık Tomas «Eýropadaǵy CLIL-sabaqtarynyń tarıhy, minezdemesi jáne problemalary – teorııa jáne tájirıbe týraly keıbir negizgi ıdeıalar» taqyrybyn qozǵady. Budan bólek spıkerler qatarynda Vıldaý qoldanbaly ǵylymdar ýnıversıtetiniń professory Pıter Enders, AQSh-taǵy Evergrın memlekettik kolledjiniń PhD doktory Nensı Koppelman jáne taǵy da basqa azamattar boldy. Sonymen qatar, dosent Narıma Esenova, dosent Asyljan Kenjekereıuly, PhD doktor Raýshan Taýbaeva, PhD doktor Gúlnur Isabekova jáne PhD doktor Perızat Qudabaeva óz oılaryn ortaǵa saldy.
Hamıt Esaman,
«Egemen Qazaqstan»
Jambyl oblysy